Azmaish

 

Ye duniya dil ki kahan sunti hai...yehan tou zuban ki hukumat chalti hai...phir jub dil jub jaanta hai sab ,tou ye taklif kaisi...

Afsos sad afsos ke kitne khubsurat rishte iski zad may aajaate hain...jahan gharz ne par phailaaye aur munafiqat ne udaan bhari...tou ye jaa vo jaa...haathon se dil,rishte,sab nikle jaayen..

umar ki chakki may sab pees daala ...khud ko tak...phir bhi kaafi na hua...

kahan socha tha jo jaan se pyaare they wahi jaan leva saabit honge...konsa rang hai ye tera zindagi...kahan kasar rah gaii thi...ye mode kyon aaya aakhir...

ek aisa rishta jahan yaqeen buniyad hai...wahan mohabbat nakar di jaati hai..bharosa tod diya jaata hai..akhir is be sar pair ki tohamaton ne kis ko kya diya...kis ne qarar paaya...

kisi ka dil tod kar kabhi kisi ko aram na aaya...ek zara si ghalathi bhi aksar rubaru hojaati hai..be aram kar deti hai...nind uda le jaati hai...phir log itni badi badi badgumaniyan kaise paal lete hain...natijatan apne hi haathon apna nuqsan kar baith te hain..

kaash unhein patta hota...mohabbat karne waale badi mushkil se milte hain...unki zaat ko tamasha bana kar khud ko paamaal kar lete hain...vo dil jiski niyat ka patta khuda ke ilawa sirf in khooni rishton ko hona chahiye tha..jinhon ne najaane kis kamzor lamhe ki zad may akar ,khud apne batin ka apne zameer ka sauda kar liya ...

khair ye bhi azmaish hai bulki kadi azmaish hai bande ki, ke khuda un rishton se azmaata hai jahan ummid na ho...kabhi shikaar hone waala paspa hojata hai kabhi waar karne waala..

khudaya..hausla darkaar hai...

Adhure Loag.....

 

 Duniya ki ranga rangi is baat ki gawah hai khuda ne insan bhi mokhtalif mizaj ke banaaye...

uski takhlikh se peshter farishton ko ilm tha ke admi duniya may aa kar kya gul khilaane waala hai..

So dil tou ekse hi dhadakte hain per dimagh apni ekhtera ke hathon maar kha jaata hai...

kaha gaya hai khaali dimagh shaitan ka ghar hai...

iska matlab ye ke soghal-e-bekaari ke rasiya inhi fasid khayalo ki giraft may ajate hain...

aur apne aapko nuqsan pahunchaate hain...

khuda ko de kar azmana pasand to hai magar, bande ka ye fale sakth na pasand hai..

ke apni tafreeh ki khatir kisi dusre ki zindagi per asar andaz ho...

waise logon ko ye masghala itna marghub hai ke vo paas-e-wafa aur humnafas ki behbudi se nazar chura lete hain..

yehan tak ke khudfaramoshi ka shikar hojaate hain..

ye kaisi sitamzarefi hai ke apne rishton ku, unki mohabbaton ko bhula kar sirf apni taskin per amada rahte hain..

jhut vo hai jo haqeeqat per perda gira kar rishton per aari chalata hai...jadein etmaad ki kaat deta hai...yaqeen ka bharam tod deta hai...

Admi sab kuch kare , per umar bhar ki punji ko yon pal may na lootay...

vo dil jisne hamesha unki hifazat ki ho ,uska haasil ye anan fanan daketi hai ... 

us dil ko is shab-khoon ki tawaqo kahan thi..

akhir khahishon ki manzil kya hai...

arzu ka haasil kya hai...

dono jahan ganwa kar paaya bhi tou kya paaya...

ek dil jale ki aahon ka her waqt rahega unper saaya..

us dil ki kaifiyet wahed khuda hi jaanta hai , jisne apnon se is zarb kaari ki ummid na ki ho...

jinki ulfat may khud ko beshumar dhoke diye hon...

baarha unki kotahiyon ko nazar andaz kiya ho...

phir bhi kaafi na hua...

kaash vo dil bhi us mohabbat ke maare ki talab jaan lete...

vo tou sirf unki muskurahat,unki purkhulus mohabbat chahta raha..

unki qurbaton may khuda ka qurb paata raha...

mohabbat ek aisa giran qadar jazba hai jiski taab her dil ko nahi...

kamzor dil is asaase ko sanbhal hi nahi sakte..

kaash ye apne aise na hote....zaruraton ka shikar hona aam hai...

magar iski khatir rishton ka qatal-e-aam na-munasib hai...

tou mere dosto,jub bhi aap ye tajruba karein , apna daman-e-dil bacha kar chalein...

ye aise daagh hain jo asani se nahi dhulte...

ye aise zakham hain jo kabhi nahi silte...

Intizaar ....

 

Zindagi ummid aur intizar ka darmyani waqfa hai dosto...so iski raftar aap pa hi nahi sakte..kub aai kub guzar gaii.

ibtida-e-ishq hai rota hai kya

dekh aage aage hota hai kya

wala mamla hai...so sab per se guzri hai hum per bhi guzar gai...ye zindagi...iske marhale..hadisath...sadmat...ghum aur khushi ke lamhath...dil kya cheez hai ye janne ka mauqa nasib walon ko milta hai...warna zindagi aksar sood-o-ziyan ke hisab-o-kitab may nikal jaati hai..ke kya behter hai kya khoob ter...aane waale kal ki fikir is aaj ke her suneheri pal ko kha jaati hai...kya waqi khushi itni mubaham hai ke pehchani nahi jaati...ye insani chehre ek perda hain jazbon ka...koi ankhon ka safar karna jaanta ho tou pehchan le ke waan kitne khamosh samandar hain maujzan hone ko...

khair zindagi ko baher-surat guzarna hai yon nahi tou yonhi sahi....rote dhote mayus hone se kya haasil....jo darpesh hai usey tou pesh aana hi hai...tou phir kyon na isey peshter hi maan liya jaaye...jo mil jaaye ghanimat hai..ke yehi hqeeqat hai...nazar churane se kya haasil...nazar milao tou koi baat hai...gharz zee faham apna kirdar bakhubi nibha lete hain...nadan matam kinaan dono jahan se jaate hain...

Taqdeer ke aage tadbeerien dhari ki dhari rah jaati hain...moqadar fareb nahi khaate...bulki fareb to insan khaate hain...khudfarebi ki adat jo hoti hai...haqeeqat se daman bacha kar us se muh moda nahi jasakta...vo tou peecha karti hai,tab tak jub tak is khudfarebi ka perda chaak nahi hojata...jub tak admi apni katib-e-taqdeer ki maan nahi jaata... 

her ek ko is imtihan se guzarna hi hai...tou phir kyon na khud ki tayari per tawajoh di jaaye..iske liye khud se mulaqat zaruri hai...honi ko koi taal nahi sakta..agar is waqfe ko jo hum ko mila hai is per ghaur-o-khaus kar liya jaaye to mumkin hai jo honi tul nahi sakti usme khuda ki inayet shamil hojaaye...yehi asal kamyabi hai...is imtihan ki...