Thursday, September 25, 2014

Zindagi Zindagi se.....



                                      zindagi zindagi se kya chahti hai
                                      zindagi ke siwa aur kya chahti hai

Mmmmm, zindagi zindagi...tu hum may maujud hai aur humen khabar bhi nahi...khabar yon nahi ke tu humare liye kabhi asaan hi nahi...hum se mil kar bhi milti nahi...hamaare saath kabhi tu chalti nahi...humen saath le kar aage badhti nahi...humen kisi mod per saath hone ka ehsaas deti nahi...Aakhir ye kya hogaya hai.....Ummid ka daman kum pad gaya hai....Ek khwab haqeeqat se mil kar shaayed dar gaya hai....Ho na ho mai hi raah bhul gaii hun...phir zindagi tera naam le rahi hun....shaayed yaadon ki koi rahguzar khayaalon may koi gul khila de...kahin kisi khushgawar mod ka patta hi bata de...ke kabhi zindagi ne humko shaad bhi kiya tha, kabhi zindagi ne humko yaad bhi kiya tha....zindagi se mil kar hum phir zinda hogaye they...zindagi ko paa kar zindagi may kho gaye they....Aye zindagi tujh ko meri kehna kya munasib rahega/? Aye zindagi tujh si meri koi soch hi nahi hai...Aye zindagi maine tujhe mehsus tou kiya hai...per tujhe kabhi paaya nahi hai....Aye kaash zindagi tu kabhi meri bhi hoti....koi lamha ban kar bas chu kar na guzarti.....mai tujh ko khud may paa kar apne hone ka ehsaas tou paati....teri khusbuvon se apni rooh ko sajaati...tere khayaal se dil ko paimaana banaati...phir zindagi tu mujh may kabhi chalak chalak jaati...isi udaan ki khaatir khayaali per apne phailaati kitni subahen apne ganwati is tanha safar ki sangaton ko ganwaati....chali jaa rahi hun beawaaz gungunaati.....Aye kaash zindagi tu ek ishaara tou karti....meri bekhayaali ko apni raah per chalaati.....mujh ko meri zindagi tu khud se milaati.....

Wednesday, August 27, 2014

Aah !








Aah ! 


Aaj vo khwab bhi chin gaya jo haqeeqaton ka bojh uthaaye huye tha....jo kuch palon ka hi sahi sakun-e-dil ka samaan tha...kitna behlaaya tha khud ko ke ho na ho saare wahimaath jhutey hain...ye nafs ke utre huye saare rang khotey hain...per aaj is zindagi ko uski asli saughaath milna hi thi...ek sach ka saamna soch ka her zaawiya badal kar rakh deta hai...per kambakth is dil ka beda gharq hi nahi hota...kahin uska koi kona ab tak roshan hai...ke nahi ye to tere dil ki karastaani thi....duniya to fareb hi hai...per khaaya to tune hai....ab jub tere ehsaas ki zad may her pal aa hi gaya hai to waqt se kaise giley shikwe....tune jub khushiyan batori hain to ab ye talkhiyaan bhi bardashth kar....ke yehin se teri ibtida hai...isi may teri baqa hai....


Shamma raat bhar jalti rahi per uska junun saza tha...aur jis perwaane per deewanawar nisaar hoti rahi vo perwana to mahaz shamma ki ek shab ki aarzi mehefil ka ehsaas tha....vo perwana bhi kaarinda-e-ameer-ul-mulk hi tha...usne najaane kitni shammaon ko pighalte dekha hoga...ek shab may unki hasti ko gum hote dekha hoga...socha jaaye to puri zindagi ek shab si hi choti aur heech lagti hai...haasil-e-zindagi bas yehi ehsaas ke kuch bhi sach nahi tha siwaye is derd ke jo shamma ki bebasi ka inaam tha jisey perwaane ne bhi mehsus kiya ...halaanke usey her us lamhe ki khabar thi jo shamma per se guzar gaya tha...per uski nazar may  ye ek sabaq tha aur shamma ki puri hasti tahas nahas karne ki zimmedaari kisi ke sar nahi gaii...na perwane ke na ameer-ul waqt ke na us anhoni ke gawah waqt ke..khair qusur un halaath ka tha jiske chungal may shamma phans gaii thi...qusur us waqt ka tha jisne apni zid ko ana ka masla bana daala tha..apne daman ko mehfuz rakhne ke liye kisi aur ka daman jala daala tha....

Hmmmmm...ye sitam itni khamoshi se hua ke khud shamma ko apni bewaqoofi ki khabar na huii...halaanke ehsaas jaage they....hosh ki ankhen khuli huii theen...per puri hasti kisi ki giraft may simti hui thi...aur vo giraft itni mazbut thi ke us giraft se chah kar bhi azad hona dobhar tha...shaayed koi dukhti rag us giraft ke taley aagai thi...aur us dukhti rag ko waqti aram mil gaya tha aur usne apne bachau ki mohaum si koshish bhi nahi ki thi...her ehsaas us waqt ek hojaata hai jub aapke rubaru aapki mohabbat mujassim pesh hojaaye...

Mohabbat kaii qismon may kaii shaklon may kaii rishton may kaii qiston may rubaru hua karti hai...per zaahir aur baatin dono ko munawar kardene waala lamha shaaz-o-nadar hi mila karta hai...rooh zakhmi zarur hai per roshan bhi...yaadon may khaar bhi hain gulshan bhi...

Saturday, April 12, 2014

Suno Zindgi......










Kal talak hum socha kiye, hum vo saraaya hain jahan musafir ku aram milta hai...hum vo panahgah hain jahan veeraniyon ka koi guzar nahi, hum khud rasta hain hum khud manzil....per ab jaa ke patta chala hai k na hum manzil hain na rasta, hum tou mahaz ek station hain..jahan jub kisi ko koi zarurat rok leti hai, jub puri hojaaye phir koi teherta nahi..kyonki raahi to safar per hai aur station bas khada muh taakta reh jaata hai...haaye ye kya vo musafer kitna pyaasa tha, vo musafir kitna tanha tha, vo musafir kitna pareshan tha, per kisi musafir ne station ki zarurat nahi jaani, na hi uske ehsaas....aji bas zindgi jub belagam ho tou bhala kisi ke rokne say kabhi ruki hai....bas daudi chali jarahi hai...jub tak qadam saath dein...jub tak manzilen pukara karen...jub talak raahen awaaz dein....ye daud to lagi rahegi...

Aakhir daad kis say chahiye..ye numaish si kya lagi hai...aur vo bhi berang..kyonki isme vo khushi mili hi nahi jiska intizar tha, jis say pyaar tha...kyon aakhir kyon...aakhir ye kaisi soch hai ke asli maqsad zehen say mahu hogaya....bas ab tou maqsad itna hai ke vo jinhen hum bhaate hi nahi unke dil may jagah banaane ki tag-o-dudh may raat din ek kiye jaa rahe hain...aur vo jo hum may chupa humen dekh raha hai mayusi say...usey hum ne nazar andaz kar diya....uski nazar may to hum tifl-e-nadan hi hain...jo uske wasee bekaraan rahmat ke samandur say faizyab hone ki ek adna si koshish bhi nahi karte....vo tou bas apne shahkaar ka perda kiye baitha hai...warna gar vo apni karni pe aata koi ek dusre ka chehra tak na dekh paata...haqeeqat kuch is tarha jabeen pe raqam hoti ke apni haqeeqat say nazar churata...

Ye duniya aur ye qaafile najaane kitne raaste nigal chuke hain...apni manzilon say humko door kar chuke hain..ab waqt hai ke hum is gerdab say niklen...aur qaaafile ke aage mashaal ban kar dut jaayen...taaki unhen vo raasta nazar aajaaye jo unki sahi manzil ka patta de...unki haqeeqat say unko mila de....na ke is bemaqsad waqtguzari ke masghale may umr ganwa de.....jub ek ijtima rooh ko surur ki raahen dikhata hai tou najaane kitnon ki bigdi banti hai..wahin jahan ek ijtima firqon ki buraii may jut jaaye tou apni aur sab ki aqibat kharab karta hai...aur apni sifat ke saath na-insaafi karta hai...vo sifat-e-insaani jahaan khuda ka aks maujud hai ..khud khuda bande ka ansar hai, 

So kyon na zindgi ka haath thaam kar uski sahi raah per usey chalaaya jaaye....yon duniya pe rone say behter hai duniya ko uske asli husn ka deedaar karaaya jaaye....jahan her ankh may sirf ek hi nasha ho...mohabbat ka....Mehbub-e-Dojahan ki takhlikh  nay bandon ki isi andaz may numaindgi ki hai...khuda bande ki mohabbat koi israr nahi hai....haqeeqat hai ke mohabbat hi bani nu ki buniyadi zarurat hai ke yehi haqeeqat may ibadat hai...gar samjho isi jazbe may poshida uski rahmat hai...log muskil say mushkil ko asan banane ki koshishon may umr sarf karte hain, ek asaan sa kaam nahi karte...bas ek dusre say mohabbat nahi karte....

Phir kyon na zindgi ke baqiya din is jazbe ko ji ke dekhen....aur khuda ki khushnudi ka ehsaas paayen....aur apni rooh ke saath insaaf karen jo azal say isi jazbe ke gale milne ko bechain hai...ke vo apni manzil jaanti hai ....uski safar ke liye jo zaad-e-raah darkaar hai vo yehi lamha hai jahan soch usey paale....aur apni azli fitrat apna le...khuda kare her dil is lamhe ka talabgaar ho...her dil per ye haqeeqat ashkaar ho..Amin.

Wednesday, March 26, 2014

Chah-ma-Goyiyaan




Hmmmm, aap sab ye soch rahe honge ke ajab mauzu hai ye , per hai aam...ke logon ka sab say pasandeeda masghala yehi tou hai..jahaan chaar sar mile wahaan khamoshi khwar hoti hai...bas tabsaron ki maar hoti hai...jaane kyon log ye karobaar karte hain, jub kaii zubaanen khulti hain baaten hazaar karti hain.. So ye wahi chah-ma-goyiyaan hain jo un zubaanon ka chatkhara hain jinhen apne siwa her koi ba-ayeb nazar aata hai..Phir kya , Ayebon ke bazaar khulte hain, ek shaks ke kaii kirdaar milte hain, phir kuch hi dair may uske taar taar khulte hain...

Sab jaante hain ke ayebon ki perdedaari behter hai, haan ghalatiyon ko sudharna behtereen amal hai..per kya kijiye, insaan apni kamzor fitrat ke haathon sada hi shikast khaata aaya hai...dil ne jub bhi raah dikhaii dimagh ne nazar churaii kyon ki pal do pal ka surur nekdili ko nigal jo jaata hai...dil jo nerm-o-nazuk shaye hai kisi ki dhajiyaan udhedte waqt itna sakht kaise hojaata hai...hmmmm ye us jazbe ki karastaani hai jisey ghusssa kehte hain..ghussa khatrnaak hota hai...sochne samajhne ki salaahiyet salb kar leta hai..aur isi laa-ilmi ka hi natija hai jo admi ko insaaniyet say door kardeta hai..

Kaash koi majlis is ayeb say mubarra hoti, yehan tak ke moqadas mehefilen bhi ab ijtimaii kasafaton may maloos hone lagi hain...log na kaan dharte hain na dil, unhen tou bas duniya ki tikka-boti karne may maza aata hai...vo hawaas jo khuda ke mehbub amal ka charaghaan hosakte hain wahi hawaas sahi aur ghalath say parey apni nafsaani taskeen may lage rehte hain, log khatakar to khatakar nekukaaron ko tak nahi bakhashte..Saahir Ludhiyanvi saheb ne sahi kaha,Achon ko bura saabit karna duniya ki purani adat hai..aur ye adat kisi aur ki nahi khud unki hi tabaahi hai...ke vo bhul jaate hain ke ek shahid aisa hai jiski nazaron ki zad say koi nahi bach sakta..Aur vo sab say aala munsif hai...

Haan tou ye Chah-ma-Goyiyaan basa awaqaath bazgasht ban jaati hain, aur kisi ki saari shaksiyet maskh kar sakti hain...jo la-ilm hai uska ilm yehin farogh paata hai...jahaan usey her koi bura nazar aata hai...halaanke gar dhuli ankhon say, ujle mun say saaf soch say madad maangta tab agar koi ayebdar bhi hota tab bhi uska perda kar leta aur khud ko is ayeb-e-kubra say bacha leta...so mere dosto ghaur kijiye ke hum apni taqaton say zyada apni kamzoriyon ka istemaal karte hain..natije may ek kamzor past himmat qaum ki nashonuma hoti hai...bahimmmat bakirdar nasal aane waale waqt ko uski azmat lauta sakti hai jo gaye waqt apni kotahiyon say ganwa di gaii ....Ek saa-at ki soch ek sahi raah ki daagh-beal hoti hai..aur us sahi raah per gamzan rahna hi insaan hone ki daleel hai...aur yaqeen maaniye hum waqi insaan hain..

Thursday, January 16, 2014

ye khayal hai khayal ka...







Mosam-e-bahaar ka nazara waqi farhath bakhsh hota hai.Isi liye iski tashbeeh khushi say ki jaati hai..Per khushi kya mosamon ki tarha tayeshuda lamha hai? Khuda jaane...Per khushi ka her lamha apna hi mosam hota hai..Jo dil per chah jaaye tou chehra gulzar hojaaye...jo nigahon may sama jaaye tou mahol purbahaar hojaaye...Kisi ne ye dua di ke ab ke khayaal apni rut na badlen...in per bahaar her mosam may eksaan khili rahe...Kaash dil per itna qaabu paaleta insaan taaki usper mahol ka koi asar na ho, na kisi ke suluk ka, per aakhir dil hi tou hai...inki zad may aa hi jaata hai...vo ek khayaal jo khushi ka sabab hota hai vo us khayaal say bhi koi waada chahta hai ke aye mere humnasheen mai her waqt tere saath hun, tujh may maujud hun...chahe koi bhi mosam aaye mai tujh may mehek uthun....kya ye waada hai?

Ye dil bada paagal hai ya isey paagal samajhna pagalpan hai...Haqeeqat wahi hai jis ka ehsaas ho, warna sab khwab hai.khayaal usi haqeeqat ka safar hai..ye safar bil-ghaib hai.Hota bhi hai aur khabar bhi nahi hoti...so is khayaal ki haqeeqat say nibah hi zindgi  hai.

Friday, January 10, 2014

Niyamat inayet hai.....





Shaakh say tut kar patte ne kya mehsus kiya...ye kis ne jaana...kisne samjha...khud us patte ko bhi khabar nahi ...ke vo ehsaas apne apni usi shaakh per bhul aaya tha...haan shaakh albata jis aziyet say jis karb say dochaar thi ye wahi jaanti hai..jaise koi maa apne bache say bichad kar mehsus karti hai, bilkul usi tarha us shaakh ki afsardgi uski hayeeat say patta chalti hai...jiska libaas hote hain vo patte, jinka saath jub chutne lagta hai tab kaisa mehsus hota hai ye us shajar say behter kaun jaane...

Tabdili tamaddun ka sabut zarur hai..magar vo tabdili jo tahzib chin le behter nahi hoti..Aaj ki nasal tabdili chahti hai magar tahzib ke daayere jub chote hone lagte hain tab ye tabdili unke liye muzar saabit hosakti hai...jis say agar koi unhen bacha sakta hai tou faqat khuda ka karam,unke buzargon ka maazi, aur apne haal per nazar saani...ghaur karne ki zarurat hai ke hum chahte kya hain, aur hamari chahten hum say kya maang rahi hain..

Chahten aksar insaan ko khudgharz bana deti hain. aur vo apne tak simat kar rah jaata hai..jahan uska koi apna pahunch nahi paata hai.insaan zara mud ke dekh leta tou usey yaad aajata ke kisi ne uski khatir apni chahten qurban kardi theen..tabhi vo aaj is moqam per pahuncha hai ke koi khahish kar sake, koi arzu paa sake...is ek lamhe say vo koson door hota hai jahan uski soch uski haqeeqat ko aaina dikha de..

Zindgi maang kar nahi mili hai...ke zindgi ki maangon say hum usko daaghdaar karden...Bulki zindgi tou ek besh baha niyamat hai..muhallat kum hai aur is niyamat ka zaayeqa paate paate hi khatam hojaati hai zindgi...koi mukamal taur per isey mehsus hi na kar saka..aakhir humen mila kya tha...aur humne apni dastaras may aai huii niyamat ko apni ghaflaton say kho diya..kaash hum waqt rehte jaan lete to shaayed ek ek pal ko ek sadi kar lete, usey apni giraft say jaane na dete..usey zinda javeed kar lete...us her pal say apne liye her vo khushi kasheed kar lete jis per zindgi ka haq hai...

Khuda ne apne jalwon ko muntashar kar ke insaani intishaar ki taraf ishara kiya hai...jub insaan apne muntashar wajud ko ek nukta-e-khaas per laa kar us muntashar jalwe say nazar chaar karne ki sayee may kamyab hojaayega tab usey patta chal jaayega ke darasal vo jalwa kabhi muntashar hi nahi tha bulki ye intishaar iske apne wajud ka tha..uski soch, uski paragandgi ka tha jo kabhi apne sahi moqam per tik hi na saki...jo usey us jalwa-e-kibriyaii ka deedar kara deti jo her shaye may mukammal tha...kahin bikhra hua ya muntashar nahi tha....

So mere azeezaan-e-bani nau Adam..apne aap ko is intishaar say bacha lo...Apni zaat ka haq ada karo...Apne Aqa ki duaon ki maqbuliyet ko sherminda na karo...jisne ummati ummati kehte huye apni ummat ke liye akhirat ka samaan kar diya..hum us hasti ki nazar kya kar sakte hain..hum salihain-o-arifain ki zindgi say misaal haasil karsakte hain ke mohabbat aur esaar-e-mohabbat kya shaye hai...waqt zarur badla hai...ehsaasaath nahi....halaath zarur badle hain jazbaath nahi...phir mohabbat ke huzur jabaath hi pesh hote hain...amal ehsaasaath hi maangte hain...asal peshi say qabal her shab khud apne rubaru apni peshi hoti hai...honi bhi chahiye....

Niyaton ki durustgi amal ki raah asan kar degi...amal zindgi ki raah ko uski manzil ka patta denge..khudavand qudus ne ye duniya humare liye hi banaii hai...aur aisa nahi hai ke koi shaye hamare liye nahi ho...phir inki tadbir karna, ya unko paane ki hasrath may khud ko un niyamaton say mehroom karlene say kya haasil...So khahishon say pehle khud ko pesh-e-nazar rakhen...ke aapki kamyabi kis may hai...