Yaqeen ka martaba

na pooch mujh say surat mere yaqeen ki

wahi surat hai sajdon may meri jabeen ki

Basa awqaat aisa bhi hota hai ke insaan apni zindgi may pesh aane waale nagawar waqiyaat aur taklif deh haalaath ka saamna karte huye khud ko tutne say bachaane ki jad-o-jahad may unhi halaath ka pehlu aur apna zaviya-e-nazar badal kar rakh deta hai taaki zindgi ki mushkil ghadiyon ko jhelne may asaani ho...aur dusre apni tawaqaat ki haar na ho...yaqeen ka tutna ek pyaasa muntazar dil sahaar kaise sakta hai...koi na koi ummid kisi na kisi shakal may insaan ka jeena asaan kiye rakhti hai...aur sab say badi aur afzal baat ye hoti hai ke usko is baat ka sau feesad yaqeen hota hai ke Rab-ul-Alamin apne bandon ke ahwal say bekhabar ho nahi sakta...gar mushkilen aai hain tou asaan bhi hojaayengi...aur in mushkilon say guzarne ka safar taye karne ke liye jo darkaar hota hai vo anokhe andaz may jub pesh hota hai tab waqi banda bekhabar hota hai ke ye nazar-e-iltifaat rab ki bande say mohabbat ki dalil hai...ke vo zakham ba marham pesh karta hai...aur insaan marham paa kar zakhm bhul jaata hai ...ye karigiri hikmat-e-ilaahi ki sab say kargar saabit hoti hai...

So yaqeen ki kaii suraten hoti hain aur kaii shaklen...aur is yaqeen ka beej mokhtalif andaz may boya jaata hai...phir laakh manzar uske yaqeen ko jhutlaayen vo apni jagah say tas say mas nahi hota...vo gunj ban jaata hai...uski baazgasht sakun ka samaan hoti hai...so yaqeen ki koi had nahi hoti..ke koi kis had tak kis per yaqeen karta hai...ya kar sakta hai...bas hota hai khuda daad yaqeen...haq shanaas yaqeen...nafs sarbuland ho hi nahi sakta jub tak imaan salamat hai..ye waswase ye badgumaniyaan ye shak-o-shubahaath ye tamam apni jagah per durust bhi hosakte hain kyonki jub tak ankhon ko mukamal nazara na mile usey sab kuch nazar ka dhoka hi lagta hai..".Fareb khana tou dil ki purani aur azli adat hai.". so her shaye ki haqeeqat khojte waqt inhi shubahaath ki wajah say usey paa nahi paata....aur apni zindgi ka behtreen aur karamad waqt isi beyaqeeni aur shash-o-panch ki nazar kar baith-ta hai..Jo wazah tasweer pesh hochuki hoti hai us say  nazar mehroom rah jati hai....pachtawe say behter hai yaqeen ki surat....

Raha Mera yaqeen jiski sab say yaqeeni shahid khud meri hiss-e-jamaali hai...ke usne mujh per ye meher kuch soch kar hi ki hogi...taaki mai gawah rahun apne tamamtar sawalon ke jawabaath ke saath....

na unke lub hile na koi junbish-e-chasm-e-khamoshan

mai hairaan hun vo bayaan tha darkhashan darkhashan

justaju jinke mizaj ka khaasa hoti hai unki justaju ka haasil aksar mujasim hojaata hai....aur unka jawab paheli ban kar rubaru hojaata hai..jo manzar may kho gaya bas vo kuch na samajh paaya...jisne is amal ke maghaz ko paaliya bas usne phir sab kuch paa liya....Rab-e-kareem ki rahmat ka ehsaas paa lena bande ki mukamal najaat ka samaan hai..

nazar nazar ki baat hai....

Aaj jub aaine per nazar padi tou kya dekha ke jo chehra dikhaii deraha tha vo wahi tha jisne kaii dinon say ye gawahi di thi, ab mai vo nahi hun ,ab mai badal raha hun, mai waqt ke saath pighal raha hun, per aaj usi chehre ne muskura kar kaha, ke sab teri nazar ka pher hai...jub dil shaad hua teri nazar ne shaadmaani chuni, jub tera dil ghumgeen hua teri nazar ne ghum ki kahaani chuni...saaare jazbe apna aks tujh may hi chod jaate hain..vo kisi aur ko kahan nazar aate hain, vo teri patangen tod jaate hain....perwaz khushi ki hoti hai, udaasi zameen ki amanat hai...khaak-saari, saare khaakh jazbon ki kok say janam leti hai..aur ye andruni uthal puthal chehre apni parton say ulat dete hain...chupaaye nahi chupte...faqat kamaal nazar ka hota hai ke vo kya dekhna chahti hai aur usko kya dikhaii deta hai...sab say badh kar usko kya dikhaya jaa raha hota hai..

Ye raaz ajnabi hain, ye raaz surmaii hain...ye raaz makhmali hain...ye raaz sandali hain...ye raaz ek paheli hain....sab nahi bujh paate...bas aate hain chale jaate hain...khud ko khojne ka , khud ko sochne ka amal kitnon ki fursat de paati hai...vo lamha-e-ghaur-o-fikr bade nasib say milta hai. qismat wale hote hain vo jo nazar-e-karam paate hain nazar paate hain...bas aisa hi karam hogaya is deewani behaki behaki nazar per....jisey khud ka bhi hosh nahi, ek lage bandhe nizam ke tahat khud ko faraayez ki dori say baandhe apne shab-o-roz say , apne guzarte waqt say  ghaafil badhi jarahi hai...khuda ne kuch soch kar hi bandon ki lagaamen kas rakhi hain warna ye belagaam khahishen sarkash dilon ki rasiyaan tudwaane may koi taamil nahi karteen...dil armaan jism aur jaan sab chund din ke mehmaan..hameshgi sirf haq ko hai..haq ka perda hoti hain khahishen ...gar nazar haq say milaana ho tou khud ko bhulana hoga....khudi say nikal aana hoga...mehbub aise nahi raazi hota...mohabbat yon nahi haath aati hai.....rab sa sona, rab sa haseen, rab sa ashiq, rab sa rangeen koi nahi...aap ko jis say bhi mohabbat ho wahan aap zara ghaur karen tou rab ka hi jalwa nazar aayega jo aapke mehbub ko aapki nazar may mumtaaz karta hai...uska koi kamaal nahi saara kamaal aapki nazar ka hai jahan rab ne apni mohabbat nazar ki....warna mohabbat jaisa nayaab jazba bashar ke haath nahi aata...

Sarfarazi ki tamanna sirf ek shert per puri hosakti hai....apne mehbub ki maan jaa...apni khahishon ke hathkandon ko jaan jaa....ek dil tamam umr ki khahishon ki jung ki kahan tak taab laata....aakhir vo thak kar  jism ka saath chod jaata hai..aur jism apni kaleed kho kar dher hojaata hai...so dher may tabdel hone say pehle gar apne dil ko zara in sarphiri khahishon say aram dein tou ye dheir koi aur shakal le sakta hai...aur apni baqa ka jwaz pesh kar sakta hai...fana ka maza tab hai jub aap mehbub ki itaa-at may fana hojaao...fana ka nasha tab dobalaa hosakta hai jub aapki ankh mehbub ko khud may paale....aur uski nazar ko apni nazar kar daale...

Sawaal-o-jawab

Zindagi say humne sada sawaal kiye hain, ab ke zindagi hum say jawab talab kar rahi hai.. Akhir tere wajud ka maqsad kya hai.kya chahton ki takmil...unki hasrath may ghut ghut mar jaana...ya khwab arzoo ka safar karte huye apne aap say mukar jaana....teri chahaton ki intiha kya hai....soch aye nadan ....tu aur tera maqsad sab fanapazeer hain...ek tera karam rah jaayega baaqi sab tera bharam hai....

waqi usne thaam ke ungli raaston ko mukhtasar tou kardiya...per wahi raaste raahi ko dekh dekh muskura rahe hain ke tu ney jaisa socha tha ye safar utna asan nahi hai...sirf ungli pakad ker raah per qadam rakhwa dene say baat nahi banti...raah ke rodon per bhi nazar-e-inaayet darkaar hoti hai..ab ye karam unke siwa bhala kaun karega...Ab aap poochoge rodon say hamaari kya murad hai...Rode anginat aur mokhtalif shakalon may  aap ke hamrah subah shaam ka safar karte hain, taaki aap unhi may uljhe rahen...aur apni raah say nazar hata len..apne safar ko maltawi kar dein.vo kehte hain na padau bas wahi padau laate hain ye rodey...nigodey....

Per khuda gawah hai hain ye pyaare hamaare ....rodey tou insan ghad leta hai...faraayez ka darja sab say ooper hota hai...khuda ne her jazba ekhtiyaar diya aur khud dekha kiya....ab mera banda junnat ki konsi gali ekhtiyar karta hai...Meri khushi mere bande ki nazar may kya hai...asaan sa raasta hai mere 5 ahkamon per amal karte huye mujh tak rasaii haasil karna...mushkil tareen raasta hai apne faraayez ki takmeel karna jo maine unhen apne rishton ke hawaale say sonpi hain...Ab ye aap ka ekhtiyar hai....

Gar banda khuda ko samajh paata tou apni mushkilon say kabhi na door jaata...ke unhi ka rab rasiya hai....phir bhi ghabra jaana fitrat-e-insaani hai...ghabrahat fitri hai...raah say munharif hojaane may asaaishon ka dakhal hai...aram talab khahishen mushkilon say pareshan ho uth-ti hain...unhen musaafaten dobhar lagti hain...ek jasth may vo manzil paa lena chahti hain...gar waqi gauhar-e-maqsood ka haath aana itna hi asan hota tou phir dono jahaan junnat may tabdeel hojaate...aur her mod per bande ko khuda milta....

Raahbar ka tasawur jub sang-e-safar hai tou her qadam per wahi hamraahi hai...Raahbar ka karam taalib say karam ka taqaza nahi karta bulki uske karam may dhal jaata hai, vo yon ke akhlaas mehekte hain, haqparasti ki mashaal bante hain...aur safar sirf hawaon ke rukh per hi nahi hota....ye nishaan rahbar ka paate hain aur un ke humqadam ban jaate hain...

Nasha Ba-Kaif

Saare nashe khud ko bhulaane ke liye hote hain...kya khud ko paane ke liye koi nasha darkaar hai? Zaruri tou nahi per basa auqaat aisa nasha bhi bakhsha jaata hai....jisme doob kar insaan khud ko daryaft karta hai....ye sab say tez sab say muhallik nasha hai jiski kaat fana ka moqam hai...ahista ahista ye hawason per chaaye huye tamaam jaraseemi asraat zaayel karta hai . phir kahin jaakar kaif ki mehefil haath aati hai...ye kaif abadi hota hai so nasha bhi lazawaal hota hai....jis say nikalna maut ke mutradif hota hai...ke yehaan tassavur-e-janaanaan ke ojhal hojaane ka jo dar laga rehta hai...ji haan ye nasha mohabbat ka hota hai jo ek gumraah ko raah per lane ke liye bakhsha jaata hai...aur jahan gumrah apna moqam apna haal sab bhula baith-ta hai us lamha uski ana per ek zarb lagaai jaati hai. bas us tilmilahat ke daur ke baad hi agahi ka dar khulta hai....ke aakhir dil-e-nadan ko hua kya tha...aur ye khayaal ke aakhir is marz ki dawa kyon kar hogi....

Hmmmmmmmmmm isi liye tou kaha gaya hai ke ye ishq nahi asaan bas itna samajh lijiye ek aag ka darya hai aur doob ke jaana hai....bas ji phir is aag ke darya may kuch khusnasib kood padte hain aur kuch ko dhakela jaata hai...jo azkhud kud padte hain usnka safar asaan hota jaata hai aur jinko dhakela jaata hai vo na doobte hain na tairte hain unhen tou bade saaz-o-samaan muhiya karaane padte hain...ek adad kashti, ek maajhi aur patwar....warna nadaniyon aur hairaniyon ke samandar say ubharna unke liye asaan nahi hota....ye nakhuda khuda ki marzi say hi tayeen hote hain taaki uske bande ke andar chupi huii ishq ki chingaar ko haq ki hawa dedi jaaye....ye ishq khuda ka ansar hai jo bande may widiyet kardiya gaya....warna khuda ashiq ho aur bande ku uski siffat na mile ye kaise hosakta tha....khuda ne apne ishq ko hi bande ke seene may muntaqal kiya...so laazim hai ke bande ko rab say deewanawar ishq hojaaye aur is kaifiyet ki jhalak apne nakhda may paale aur deewana hojaaye.......................

ishq faqat jazba-e-aatish hi nahi hai

ye bande aur rab ke taluq ka nishaan bhi hai

Zindagi Ka Hisaab

Zindagi ka apna alag hi andaz hai...jiski nazar ka zaviya hisaab kitaab per tika hota hai uski muthi uska asmaan hota hai...yehan tou saara hisaab hi ghalath hogaya tha...jisne door-ras nigah na paai usey kub ye zindgi raas aai...bas zindgi bade aram say munkir hogaii..usne ek hasrath bhi dhalne na di...usne zindgi ki ek na chalne di...Aakhir aqal ke andhon ki binaii, mohabbat kahan ban paai..log tou mohabbat ki duhaii per hanste hain...unhen is lafz ka yaqeen jo nahi hai...."sehraii  tou labrez pyaale ko bhi saraab samajhte hain"...bilkul yehi maamla hogaya tha...kisi ko mohabbaton per yaqeen nahi aaya...sab ne isey bhi broadway ka ek play hi samjha....halaanke un do ankhon ki takraar barabar jaari thi ke arey logo kum say kum ekbaar hi sahi mujhe sun lo...umhm...nahi suni kisi ne...sab ke paas apni hi faryaad thi...aur uske paas ab faqat apne kuchle huye palon ki yaad thi....

Aakhir doodh ka jala chanch say bhi jul gaya...phoonk phoonk ker peene ki naubat tak na aai...zindagi ki raftaar ne usey ghataghat pi liya....usne un julte angaron say apni aag bujhaii...sach....log tapish say ghabra kar paaniyon ka sahara lete hain..aur yehan tou paani ne hi aag laga di...sukhe khet khaliyan choon-o-charaan kiye baghair hi jul gaye...vo lub jo kabhi khul hi na sake bas chup chaap sil gaye...ab kehne may rakha hi kya hai...jub ke yaqeen ki khidki band padi hai...

Jaane kyon log sangdil hote jaarahe hain...sangdili tou baad ki baat hai...behissi ki chadar odhe daman bachate phirte hain...aakhir unka kya lejaati zindgi...gar do phool koi khila deta....koi meetha raag suna deta..koi ummid bhara ek khwab dikha deta....baat arzoo ki nahi hai...jeene ki wajah ki hai....jiske paas jub kuch nahi hota unhen ek ummid ka sahara hi tou hota hai...ke kahin ye aane waala kal vo khushi lekar miljaaye jiski tamanna may hirni si badi badi ankhen angoori hogayeen...kahin dil-e-nashaad ki shaadmani ka koi sabab miljaaye jiski chah may vo khila khila mosam khizan-raseeda hogaya ...bas chahat khushi ki ummid hai...hasrath ki takmil hai...haan ab dene waala maangne waale ko azmaate waqt zarur ye soch le, ek tarsa hua dil apne samne apni pasandeeda shaye pakar muh kaise pher le...her koi " zahid "tou nahi hota..jise apne nafs ko raam karna aajaata...

"Nafs" khushion ki tamanna ka gunahgar nahi hosakta....be-qabu khahishon ki  dore tou haakim ke hath hoti hai.nafs ki kya majaal jo belagaam hojaaye...haan khwab-o-khayal zarur sarkash hosakte hain...unhen bhi baar baar ki inkaar say zad-o-kob karke behaal karliya jaata hai...ab baaqi kya bacha...faqat ek machini nizam, jisey jo jaisa chahe chala leta hai...phir ekdin haakim is khaul ko apne paas bula leta hai...

Chaand si zameen aur vo asmaan sa...

Vo zindgi jo kabhi ji hi nahi…kahin door khadi raah tak rahi hai..kya kabhi vo raah milegi bhi…ya phir yon hi cut jaayegi jaise abhi tak cuti hai…khud say be-perwah…khud say nalaan…khud say naraz….khud say khush….khud say shikayet….hmmmmmmmmm…..zindgi tu ne kahan diya mauqa…do lamhe teherne ka….mud kar dekhne ka….ke kya kya chod aai hun mai…khud ko bhi….mai kahaan mili in dinon….sab ko lagta hai ke mai mili hun…umhm….nahi tou…ye mai nahi hun…mai kahin rah gaii hun…jahan ki arzoo thi..usi jahaan may….wahin mile they mujhe dono jahaan…jahaan mai khud say mili thi….phir kisi ka hosh nahi tha……khud ko daryaft karlena kisi mearke say kum nahi hota…..aur maine khud ko daryaft karliya…us ek lamhe ne us jahan ki sair kara di….jo sirf khwab tha…hawason ne pehli baar uska maza chakha…maine pehli baar chaand ki zameen per qadam rakha…

Aaj jub bhi zara hosh ke lamhe milte hain tab khud say poocha karti hun...ye kya kar rahi hun mai...kahin is qeemti waqt ki naqadri tou nahi...jo ek baar nikal gaya tou phir haath nahi aata...hmmm waqt ko kahan gina maine...khud ko kahan suna maine...jub talak khwab they madhoshi thi, jub khud say mili tou bekhudi mili...aur sairi ne aseeri ka matlab samjha diya.....ke sairi ek aisa surur hai jiska moqabla koi nasha nahi kar sakta...Koi sada rahe kisi ke saamne , koi kahin kisi khayal ki giraft may rahe....koi talab bhi nahi rahe, magar talab-ju ki talaash-o-justaju kahe...ho na ho baaqi hai abhi ye adhuri daastaan..Anjaam say pehle kaii marhale aayenge...jo mujhe jaane kahaan kahaan le jaayenge...

Daur chahe jonsa bhi ho , rooh perwaz paaleti hai....soch ka daayera kabhi nahi simat-ta...jism waqt ki zad may asakta hai...dil nahi...uska her kona apni tamamtar failen(files) mehfuz rakhta hai...ab tak kya kya ghata...zindgi ne kitne mauqe ganwaye, hauslon ki chah ne khahishon ki rassiyaan kub kub kaat deen...waise bhi jahan khahishon ka guzar ho wahan manzilen gum hojaaya karti hain....hosh per perde jo pad jaate hain..

"Sochne aur samajhne ki muddat ka naam hi Zindagi hai"..

Waqt ek muhallat hai daryaft ki...jism ek zarurat hai bazyaabi ke liye...rooh pehchaan hai apne asal ki...isi murakab nay haqeeqat ko ashkaar kiya hai..gar samjho ...aur mai samajh samajh kar bhi jo na samjhe aisi nasamajh hun..bahut say honge...mujh jaise...jinhen mauqa milta hai...luta dete hain...kyonki aise jazbaati log kache saudagar hote hain...khuda ne barha apne bandon say kaha....her rishte say bartar tera mera rishta hai...khuda bande ka....abad-o-ahad ka....aur banda is ek puryaqeen aur hameshgi waale rishte ke siwa anginnat rishton ko nibhaane may ulajh kar khud ko ganwa baith-ta hai...per haqeeqat yehi hai ....is jahaan ya us jahan ek apna wahi hai..

Pehchaan Azmaton ko..........

Vo lafz jo azmaton ka shahid hai aksar heech lagne lagta hai...kya koi rutba hone say hi haasil hojaata hai...us rutbe ka ahal hona bhi shert hai...ab misal ke taur per koi promotion kisi ko isliye milta hai ke vo is taraqi ka ahal hai...warna vo jahaan tha wahin ka rehta...is rutbe ki ahaliyet hi usey is rutbe ke qaabil karti hai...warna vo apne moqam say aage nahi badh paata...

Khuda ne soch samajh kar hi rishte banaaye aur insaanon ko insaanon ke hawaale kiya..taaki vo ye dekh sake ke khilafaton ko paane waale kub uske khilaaf jaate hain...kahan vo uski sherton say mukar jaate hain...kub apni hirees bhare nafs ki shaitaan tabiyet ka shikaar hokar apne hi gosht post ko noch khasot daal-te hain....yehi wahashat hai...yehi nafsaani khahishon ki ghulaami humen hum say door kar deti hai....Kash her azeem rishta apni azmat ko samajhta aur usey barqaraar rakhta phir kahin bad-amani na hoti...na hi koi apnon ke hote huye unki adam maujudgi ka gila karta...

Ek aisa rishta jo kisi dore ki tarha sare rishton ke kal purzey jode rakhta hai, agar wahi dor cutni shuru hojaaye phir kal purzon ka kya, vo bhi bikherne lagte hain...phir koi saancha uski asli haieeat may nahi milta..."pehchaani huii surat bhi tab waqi pehchaani nahi jaati."Ek us rishte ki beraah rawi sab ko le doobti hai...khuda ki hidaayet jin badnasibon ko nahi milti unka rona her vo dil rota hai jo uski zad may aagaya ho...

Dil her ek ka eksaan hi dhala....insaan ko baqaul khuda ke sada uski fitrat ne hi chala..aur ye rangarangi fitrat insaan ko azmaane ke liye hi bakhshi gaii...aur insan apne rutbon ka najaayez fayeda uthaate huye ye bhul gaya ke vo asmaan waala her ek per nazar rakhe huye hai...yehaan zikr rishton ke rutbon ka hai...log aksar lebel lage product say dhoke kha jaate hain...aksar vo nahi milta jo dikhta hai...patta nahi dil waqt aur halaath ke saath kyon kar badal jaate hain..

Eksi mohabbat lutaane waali hasti bhi tafreeq aur niffaq may ulajh kar apni haqeeqat say cut jaati hai...kaash kum say kum is rishte may tou azmaish na milti...phir kis rishte per yaqeen kare koi...jub panah-gah hi mehfuz na ho tou phir konsi jaa-e-panaah dhunde admi...jub vo daman jisey nichodte tou farishte wazu karte us daman ki rangat badal jaaye tou konsa daman thaamega admi...per ye tou honi hai hokar rehti hai...Aina rubaru ho aur manzar ojhal hojaaye tou phir tareekiyon ke siwa kuch nazar nahi aata...Ujalon ki aas may andheron may satpataate hua admi kisi andekhe haath ki tawaqa kahaan karta hai...vo tou wahi maanus lams chahta hai jahan sakun mila karta tha...vo haath badhta bhi hai tou taalib ki tarha....aur khuda ka fermaan hai uski talab puri kar...chahe tere nafs per giraan guzre...kinaare kinaare kuch haasil nahi hota....doob kar hi safeena haath aata hai...

aksar hum ko doobaya hai apne hone ne

warna kinaron ko hum say shikaayet hoti

Na jaane kyon......

Ye rishte jo kabhi mere they hi nahi mai unhen apna banane chali thi...kaash aisa ho paata.hota bhi kaise....ke khuda mujhe inhi ke zariye zindgi say milana jo chahta hai...mai roz roz mil rahi hun...aur mere dil per her lamha ek zarb kaari hai...ab agle lamhe na jaane kis ki baari hai...Sabaq zindgi ke naye tou nahi hain...per ab ke derd shadeed hai....najaane kyon....

Jis ki ummid ho jub vo rubaru hojaaye tab kaisa lagta hai ye jaana maine...Is baar Ramzaan mubarak ek naya tohfa lekar mila hai...Acha hai...ek naqab uter gaya hai...kahin koi aaj kisi ki nazar say gir gaya hai...Kahin koi haqeeqaton say mil kar mar gaya hai...kya waqi ...kyon aakhir....zindgi ne ye kaisa sila diya lahu ki ek ek boond lekar .....kya tha ye...dhoke tou sada hi khaaye they....magar ab ke patta nahi kyon dil ko kyon itni taklif huii....

Shaayed dil ko aas thi..ache waqton ki....apni mohabbaton ka yaqeen tha...ke vo dil badal denge...hum apni jaan ke badle unke dil lenge....per sabhon ne jaan leli aur apna dil daman sab bacha liya....apna bachaate bachaate bhul gaye ke unhon ne beshqeemti shaye ganwa di hai....jo unki jaanbakhshi ke kaam aa sakti thi....uska bhi afsos rahega mujhko...ke mai unhen bacha na saki....

Sahi kaha tha aapne Baba" kisi pe andha bharosa mat karna" waqi jazbaat jub dusron ke apne seene may uter aate dikhaii dein tab bhi unka bhi tajziya zaruri hai, ye ab jaa kar jaaana maine...aksar chehre masumiyet ka mazaq ban jaate hain...aksar dil khud apna shikaar hojaate hain...kaash khuda kisi ki neki ke sadqe hi unka dil badal deta...kaash....ye kaash hi meri dua ban jaaye....is ummid ko kabhi maut na aaye...

Ek saa-at

Zindgi aksar ye jalwey bhi dikhaaya karti hai...Ristey huye zakhmon per marham laga kar rulaaya karti hai...Akhir rona kyon aata hai...ye numi ankhon ki kya insani rawaiyon ki marhun-e-minnat hai...Kyon ye moti khaaron pe lut jaaya karte hain...inka moqam tou makhmali sandali chaadar hote hain...jahaan khusbuon may basa ehsaas-e-khuda hota hai...jahaan khuda ke mehbub karam apne safar ka aghaaz karte hain...phir is numi ko in motiyon ko in fuzul si herkaton ki nazar karna apni niyamaton ko zaaya karna hai...Tou aye dil sanbhal, apni raah say na phisal....ye nahi hai manzil teri...tujhe aur chalna hai chal...tu bas is mod say aagey nikal....gar tu ruk gaya phir na badh paayega....na apni jadon say kabhi tu juud paayega....ye lehrana chod de...ye dagmagaana chod de....jo teri raah rokta hai kyon na usey chod day...Soch le...

Kaash faisle asan hote...jazbe taqatwar hain...aur unki hifazat per khud derd maamur hain...aise may khud say humdardi kya maayne rakhti hai..afsos us baat ka hota hai jo nahaq ho...yehan tou saare saudey haq ke hain...isme kya kya luta iska hisaab kitaab hua nahi karta...bas lut jaaya karte hain....khamoshi say...chun-o-charan kiye baghair.....phir ye waavela kyon macha rakha hai dil ne.....Shermsaari say behter ghumgusaari hai....

Maana ke duniya sitam karte shermaati nahi...na hi koi afsos hota hai usey apne fale per...na hi koi pashemaani...kyon ki uski zindgi ka yehi maqsad taye hua hai....phir tu apna maqsad ganwaaye kyon...ghaur kar...aur samajh....kya hai tera dil...tera mizaj...teri hasti ka raaz....jub sab kuch hai moam sa...usey sholon say kub tak bachayega....isi julne ka naam hai zindgi....pighal jaane ka naam hai bandagi...phir bhi baaqi rahega tera wajud....wahin ashkaar hoga baad fana baqa ka matlab....

dil tou hai sanam aashna................

jo mai sarbasajda hua kabhi tou zameen se aane lagi sada

tera dil tou hai sanam aashna,tujhe kya milega namaaz may

Iqbal saheb ne kitna sahi tajzia kiya hai hazrath-e-insan ka...haal tou bas kuch aisa hai...jabaja sanam khaane hain, her fitrat yehi kehti hai.....ek dhundo hazar milte hain, bhala bach kaise paaoge, ek dil may sau sau sanam rehte hain...koi maa ban ker le dooba, koi walid ka saaya nikla, koi biwi bachon ki parchaii....koi doston ka shaidaii...her taraf thi is faani duniya ki faani ranaii...bhala admi kaise samjhe...inhi rishton may uljhi huii thi uski apni sachaii....

Sajdon ka maza tou tab aata...jub kisi ghair ka ghulba na hota...ye tufaan bhi ekbaar aata hai...saare sitam dhaata hai aur admi ku samjha ke jaata hai...ye saare jazbe pal do pal ki kahaani hain...ek wahed vo bande ki amar nishaani hai...

Khuda khud yehi chahta hai..Banda duniya bhar may khoje....her rishte may khud ko soche....jub khud ka samna ho, tab khud say yehi pooche....kya kabhi in rishton ke darmyan koi lamha aisa mila hai...jahaan is duniya ke bheed may tera dil Rab say jaa mila hai...gar koi chot tujh say taskeen koi maange, tere dil ki herkat say bhi pehle uski rehmat herkat may aaye....us lamha ye muamma ashkaar hojaaye.............jub talak makaan na ho khaali makeen rahega sawali...

Socho Zara............

Ek insan ki soch usey uske maa ke batan say hi milti hai...Jub ke vo maa ke batan may 40 din ka nutfa-e-hamal ban kar maujud hota hai us waqt jub uski rooh bheji jaati hai alam-e-arwah say...Usi waqt khuda uski qismat taye kar chuka hota hai..Ek insaan ki qismat uski maa ke jism ki gardish say judi hoti hai...aise may vo kahaan un mizaj-o-asraath say bach paata jo ke uske pehle mahol may pehle say maujud milte hain...Ek insan ki dhadkan jiski dhadkanon ke saath judi hoti hai vo usi ki laye ko hi zindgi maan leta hai...ye fitri hai...Sab say khubsurat mohabbat maa aur bache ki hoti hai...ek paasban dusra uski jaan...ek ek lamha uska ehsanmand hota hai insan.

Ek insan ki perwarish ka zimma aur ek insan ke suprud karna khali-az-sabab nahi tha..Aur Adam ki pasli say aurat ku dhalne ka matlab yehi tha ke ye rishta atut talluq bana rahe aur yehin say lazawal mohabbat ki ibtida ho.jis tarha jism say uska koi bhi hisse ka alag hona  insan ko kamzor kar sakta hai.. Admi aur aurat donon ki hum-nashini ek aur ferd ki perwarish ke liye behad zaruri hai..Khuda ne bahut soch samajh kar hi apni takhlikh ke ye mukhtalif rang chune...

Adam ko hawa ki shakal may ek khubsurat rishte say nawaza..Yon is khubsurat duniya ka aghaz kiya...Aur unhen apni makhlukh ki takhlikh-o-perwarish ki zimmedari bakhshi...isi ummid per ke usne unhen apne wasf ke vo hisse barabar bakhshe jo uski makhlukh ko unke paasbaanon say milne waale hain.Farayez say kotahi muhalik sabit hosakti hai iski bhi wizahat kardi gaii...unke liye misaalen qaayem ki gayeen...zamaane dohraye gaye...jahan insanon ki gumrahion ne tabah-kaariyan machaaii theen...Aur qaumen barbad huyeen ...Phir bhi khuda ki rehmath ne unhen mauqe faraham kiye sanbhalne ke...samajhne ke...pehchan ke....Aur ye silsila hazrat ezazil ki azmaish thi....ke jub tak tu nahi thak jaata hum bhala khamosh kaise ho sakte hain....tere daawon ko jhuta sabit karne ke liye hi hum adam ki rooh may maujud hain...

Aur admi aur aurat ke rishte ko ek khubsurat kadi bakhshi gai...Aur unhen Maa aur Baap ke rutbe say sarfaraz kiya...ye sarfarazi yon hi haath nahi aai thi...iski sherten bhi kadi theen...apni zindgi unhi ki nigehbani may sarf karna...apni khushion ko unki bahbudi per tarjeeh dena...khuda ka maslak unke suprud karne may kotahi na karna....unhen ek kaamil insaan banaane may koi kasar na chodna....unme Apne Aqa ke tamaam ausaf-e-hameeda ke ansar widiyet karne ki koshish karna...jo ke her bani nu ke liye unki saanson ka dar-o-madar hain...

Aur is kaar-e-azeem ko paaya-e-takmil tak pahunchaane may sab say bada haath Maa ka hota hai..Isi liye Khuda ne Insaan say kaha ke tumhari junnat Maa ke qadmon tale hai...iska matlab ye nahi ke khuda ki sohbat waali junnat yehin pe milegi, bulki ye junnat maa ki khidmat ke iwaz bhi insaan paa sakta hai...us Maa ki khidmat jisne apne bache ki ek awaz per apni ninden haraam ki , apne bache ki bhuk-o-pyaas per khud ko faramosh kiya...Jis ne is duniya ke hungamon ki misaal samne rakhi aur apni aulad ko ek achi soch bakhshi ek sahi soch say usey arasta kiya....jo uska aane waala kal taye karne waale hain...yehi vo sab say aham zimmedari hai jo khuda ne Maa ke suprud badi ummid say ki thi ke ek insan us shafeeq aghosh may apni zindgi ke behtreen daras lega aur khuda ke bataaye huye raaston per chal kar apni aane waali naslon ke liye misaal qayem karega....

Ek insaan ka sahi hona ek qaum ka sahi hona hai...ek sahi aur acha khayal bilkul kisi khushbu ki tarha ehsaasath ka safar karta hai aur kitne dilon ko kitne zehnon ko mehkata hai...Aur ye mehek maurusi asraat liye hoti hai....ta-zindgi dilon ka safar karti hai.

So dosto ye sochne aur samajhne waali baat hai..ke hamara ek ghalath qadam, hamari ek bahaki soch, sirf hum tak nahi rehti, hamare aas paas bikhre rishton ko bhi lapet may le leti hai..Aur uske samraat unke aane waale waqt ko tabah kar sakte hain...Ye hamara ferz-e-awaleen hona chahiye ke hum apni nasal ko hamari be-qabu zindgi ka nishaana banne say roken..Hum pehle khud per qabu rakhen, hamare satrangi jazbon ka tajzia karen, ek insaan ka khud per qabu paana kaii insaanon ki zindgi may sukun-o-khushi ka sabab ban sakta hai...Bas ye amal ek choti si qurbani talab karta hai...aapki nafsani taskin ki qurbani...aapki aalihimmat ka taalib hai ye waqt,jisne apne ghazab per qabu paaliya usne junnat fatah karli...kyonki wahin say israr khulne lagte hain...khuda ka wada yehi hai " inna-lillahi-maa-sabireen "

Mera Dost

Pal pal ke tajrubaat khayaalaath per hawi hone lagte hain...Aur zeheni paragandagi ka sabab bante hain...So tahreeren bhi rang badalti hain....per inhi ka nichod hoti hai zindgi...inhi say soch ko raah nasib hoti hai...ke kub hum dagmagaye, kub humen sanbhala gaya, kub humen hosh may laaya gaya..ehsaas dilaane ke liye hi halaath pesh hote hain...so mere Dosto mujhe yaqeen hai ke aap insay apne liye behteri ki raah chunenge...

Insan ki yehi fitrat hai vo hamesha khushion ki talaash may hota hai...jub tak milen khushbash aur khushdil rehta hai...Zara si hawa kya badli muntashar hone lagta hai....Ab ye khushi khushi ki baat hai ke usey khushi kis may milti hai...Aur mushkil her us baat say hoti hai jo tabiyet per giraan guzre, nafs ki charagiri per kamarbasta dost bada marghub hota hai..Aur naseha Dost raaton ki nind uda le jaata hai...Yehin say zindgi ka vo daur shuru hota hai jahan insan ki parakh hoti hai..uska mustaqbal taye hona hota hai...Maazi ki kotahiyon ko haal ki danishmandion say mustaqbal ke natayej tak lejaana asaan nahi hota...Inhi mushkilon ko asaan karne ke liye mavin-o-madadgaar hote hain insan ke anjaane may kiye gaye ache amal....unka alag hisaab hota hai...Uski fitarat ke asli rang achanak hi ubharte hain.aur wahi haqeeqi hote hain.

Yehan mai is baat ka zikr karna chahungi...jo wada zubaan nahi hota vo ada hota hai...wafa hota hai..mai jaanti hun ke kub kahaan aur kaise mujh may hausla ban kar namudar hua tha vo..mera madadgaar ban kar sang chala tha vo..Meri har mushkil usko pareshan karti hai mai jaanti hun...uski yehi baat meri mushkil asan karti hai....mai jaanti hun haan mai jaanti hun...ek aisa rishta jisme her rishte ki mehek mili khudaii niyamat hai...Kya waqi mai itni khushqismat hun...zahe nasib, ke mujh per mera rab meherban hai, meherban rahe......

Hai Bahaar Pur-israar

Mosam-e-bahaar ka nazara waqi farhath bakhsh hota hai.Isi liye iski tashbeeh khushi say ki jaati hai..Per khushi kya mosamon ki tarha tayeshuda lamha hai? Khuda jaane...Per khushi ka her lamha apna hi mosam hota hai..Jo dil per chah jaaye tou chehra gulzar hojaaye...jo nigahon may sama jaaye tou mahol purbahaar hojaaye...Kisi ne ye dua di ke ab ke khayaal apni rut na badlen...in per bahaar her mosam may eksaan khili rahe...Kaash dil per itna qaabu paaleta insaan taaki usper halaath ka koi asar na ho, per aakhir dil hi tou hai...inki zad may aa hi jaata hai...vo ek khayaal jo khushi ka sabab hota hai vo us khayaal say bhi koi waada chahta hai ke aye mere humnasheen mai her waqt tere saath hun, tujh may maujud hun...chahe koi bhi mosam aaye mai tujh may mehek uthunga....kya ye waada hai?

Ye dil bhi bada paagal hai ya isey paagal samajhna pagalpan hai...Haqeeqat wahi hai jis ka ehsaas ho, warna sab khwab hai.khayaal usi haqeeqat ka safar hai..ye safar bil-ghaib hai.Hota bhi hai aur khabar bhi nahi hoti...so is khayaal ki haqeeqat say nibah hi zindgi  hai.

Kahishon say azaad hone ki khahish karna bhi ek khahish hi tou hai...so khahishon say chutkara mushkil hai...per vo khahishen jo khamoshion ko bakhshi jaati hain aur phir unki parakh hoti hai..Aakhir kis say sawal karengi...ke humne tou nahi chedi thi ye daastaan...phir hum say gila kaisa...Gar tum na mile hote aur hum ko na gile hote....Ab ye inayet hi tou hai pyaase sehra ko samundar kardena...ab is samundar ki yehi fitrat hai apni betaabi lehron ko bakhsh dena....apni gehraii deewanon ki nazar karna.....

Ain-ul-Haq

Maine logon ko merte huye dekha....per logon ko unhen yaad karte huye nahi dekha...Ek insaan jo kal tak saansen le raha tha, jis say her rishta juda hua tha, jis ka her rishta talabgar tha, jiska hona niyamat say kum nahi tha, jiski ahamiyet apna juwaz rakhti thi, vo aaj zehen-o-dil say rukhsat hota hua dikhaii diya...Ye hote hain Duniyavi rishte jinki chah may hum dono jahaan bhula dete hain aur isi ghalathi ki padaash may hum say dono jahaan choot jaate hain...Kaise nadaan hain hum....Her sauda ghaate ka kar baith-te hain...

Na khuda hi mila na visaal-e-sanam

Na idher ke rahe na udhar ke rahe

Gar kisi ko parakhna ho tou mar ke dekh lena chahiye...per kya kijiye zindgi bhi dobara milegi nahi...so jo karna hai abhi karna hai....so Her kisi ki maut hi is baat ki gawah ban jaati hai ke khuda bande ka rishta kya hai...Aur bande ka is duniya say kya waasta hai..Zara ain-ul-haq ka nazara kar len...phir her jazbe ki haqeeqat wazah hojaayegi...

Akhir in chund saanson ka taqaza kya hai...jub tak ye chalengi inhen apni mehek chahiye...dehak chahiye...apne hone ka yaqeen chahiye...chaliye yaqeen aa bhi gaya....per kya in ki sahi qadar kar paaya hai bashar....warna apna ye hashar na karta...ek insaan ki soch hi uski zindgi taye karti hai..usey wahi milta hai jo vo chahta hai...chahaten gar ghalath huyeen log bhi ghalath hi milte hain..log gar ghalath milen phir zindgi ghalath raaston per chal padhti hai.Aur ye raaste kabhi sahi aur asli manzil nahi paate...bas bhatkan nasib hoti hai..

Zindgi aur maut sirf samjhaane aati hain..aur hum hain ke jeete ji kahan samajh paate hain aur mar kar sirf dekhte reh jaate hain..Duniya sirf tamasha hai aur log tamashaii....yehan her rishta sauda hai aur rishte saudaii...in may ulajh kar kisi ne uski ulfat nahi paai...Kaash aye kaash baad az maut kisi pe kya guzarti hai isey her pal banda yaad kar leta phir jeete ji ye mauten kabhi nahi marta...koi kisi ke liye nahi rota....jo kal tak jaan say tha pyaara usey baad marne ke pal bhar gawara nahi hota.....

Maana her shaye faani hai...is jism ki bhi bas chund roza kahaani hai....zindgi ki mukhtasar jawani hai....magar jo apni hasti ki perwa nahi karta duniya bhi usey faramosh kar deti hai...So aisi duniya ke peeche apni hasti ganwaii bhi tou be-maani....gar ye nesti raah-e-khuda hoti phir usi may khuda bande ki ulfat ki wafa hoti...aur apni is khaak hasti ki baqa hoti...wahi insaan ki asal irteqa hoti....Kahan hum yaad rakhte hain mohabbat ke usulon ko.....meheboob hai yehi itba apne jaan say pyaare rasulon ko...

Tajzia

Waqi kehna asan hota hai aur karna mushkil...amal ka jazba apni jagah magar amalpaira hone may jo diqaten pesh aati hain vo apni jagah thos haqeeqat rakhti hain...khud say kiye huye waadon ko pura karne ki khahish jub amal maangti hai us waqt ki tazbazab is baat ka sabut hai ke aaya ye amal jiska beda uthaaya hai mazeed mushkilen na khadi karde...ye nafs ki chikhen hain jisey asuda ghadiyon ki adat hoti hai, jo pareshaniyon say ghabrata hai....per jo nafs ki gal sune vo rab ki gali jaaye kyon....vo royega hazaar baar koi usey rulaaye kyon....hmmmmmmmmmm tou bas ji phir hum bhi apni jabeen per tere sajdon ka nishan hi rakhenge...waan koi bal padne nahi denge....

Insaan ka dushman awal insaan hai..Shaitan saheb tou peeche haath baandhe ghaur karte rehte hain ke kub ye farigh hon tou apni baari aaye...shaayed kabhi aaye bhi na...kyon ki ghusse ki aag shaitaan say bhi zyada taqatwar  hoti hai..aur ye kisi bhi rishte may dar aane ki quwat rakhti hai...kisi bhi...isliye insaan ko hamesha is say daman bacha kar chalna chahiye....Halaath ki shiddat dil aur dimagh ko maavuf kar sakti hai...us waqt ghaiz-o-ghazab ka shikar rubaru aane waali her shaye ho sakti hai...so khud ko un halaath may bhi sanbhale rakhna behad zaruri hota hai...kyon ki ek behter insaan apni kamzoriyon say behter waqif hota hai...Ghalathi sarzad hote hi us ghalathi per nadamat ka ehsaas usey saamne waale ki hatdharmi say zyada sataata hai..Aye kaash mai usey muaf kar deta...Kaash mujhe ghussa na aaya hota....so in do kaashon may phans kar ek aur kaash bechaara hojaata....So mere azeez Dosto, apni soch ko ek mauqa zarur do...

Tou aaiye phir ek ahad karen....jub rab ki khushi madd-e-nazar hai tou apni aankh apne kaan apna dil apni jaan sab usi ki khushi ke liye waqf karen....vo wajud jo rab ki amanat hai agar koi insaan usey gazand pahuncha bhi de tou ab ye tou rab ka maamla hai vo chahe tou her us waar ko rokh le ya phir uska rukh mod de....taaki bhale aur bure dono ko uska ehsaas hojaaye ke un dono ke darmyaan ek munsif huma waqt maujud hai...

Koo-e-Yaar

yeh vo waqt hai jo jaan talab kare

 makeen nahi ye makaan talab kare

Koo-e-yaar tak ka safar dekhiye kahaan kahaan say kin kin raahon say liye jaata hai...Jo sab ko nazar nahi aata vo us nazar ko nazar aata hai jiski nazar koo-e-yaar per jumi huii hai...Badalte halaath aur guzarta waqt bhale hi uske hawaas kamzore kardein usey itni khabar zarur hai ke vo herdum uski nigaah may hai...uski nadaaniyaan, uski qurbaaniyaan, uski kotahiyaan, uski achaiyaan sab sab say bakhabar hai vo....Magar ye ehsaas us waqt ghaafil rehta hai jub bekhabar badhawas hota hai...Usey muhallat hi nahi milti soch ko samjhaane ki...

Aye mere makeen, tujhe bhi khoobter ki hi talaash hai...phir tera deewana kyon kar na ye siffat paata...usey jub hersu tu hi tu hai nazar aata....Haan mere Dost, in numnaak palon may bhi tu hi mujhe yaad aaya...ke teri nigaah say kuch bhi chupa nahi hai....jo derd ko nazarandaz karde vo khuda nahi hai...Mujhe naaz hai ke tu mera khuda hai, aur mai tera muddua hun....haan...ke tune bani adam ko ek khaas maqsad ke tahat jo paida kiya hai tune....Sadaq Allah-ul-Azeem.

Haq aur sadaq dono gar khamosh hogaye phir tou baatil muhzor hota jaayega...Jub ke jahalath  ka saamna khamoshi say karne ko kaha gaya hai..us khamoshi ko darr maan kar kahin vo apna seena taan kar apni tana-shahi per maghrur na hojaaye...Yehi ghurur ek sar say dusre sar ki talaash may jut jaata hai taaki vo banda jiska sar sirf khuda ke aage jhukta ho uske saamne jhuk jaaye...So teer bhale jigar na chhale per dil per tou chale...

Sun isey zara ghaur say

sun isey zara ghaur say

na ghabra is shor say

rahbari ishq ki jise mili

wahi guzra hai is daur say

Kaafi dinon say maine yehaan kuch likha nahi....kyon ki mai khud say hi mutmayeen nahi hun....Aakhir dil ko manane ki tag-o-dudh rang kyon nahi laa rahi hai...Ye kadwahat zindgi say nikal kyon nahi jaati....ye shor huma waqt ka jaayez nahi...kyon ki isme shikayeten hain...naale hain....hum kon say is jahaan say jahaan waalon say niraale hain...Hum bhi wahi kar rahe hain jo sab kiya karte hain....apne dil ki bhadaas kya lafzon say nikal jaayegi ya lafzon say behel jaayegi....Aakhir is pehchaan ke safar say guzarne ka kya haasil...Jub dil raazi ba raza na rahe.....uska faisla hai....jo qismat may likha hai...usey tou mil kar hi rehna hai...phir ye ranjishen kaisi.....ye bhulaawe kaise.....Ab waqt nahi hai in baaton ka....Ab bhi dair nahi huii hai....Vo saare panne ulat kar dekh aye dil...jahaan tujhe ek naii aur sahi raah mili thi....Tufaanon per baandh kaise baandhe jaate hain ye seekha tha tune....Abshaaron ko gulzaaron ki taraf modna aagaya tha tujh ko.....phir ye kya.....rok le na ab is darya ku....jo toghayaani ki lapet may aana chahta hai....nahi....ab nahi...warna vo saare sabaq tujh say hisaab maangenge....jawaab bahut say honge tere paas, magar tu de nahi paayega...kyon ke sawaal ki haqeeqat us say bhi bartar hai....

Jub tujhe dil bakhsha gaya tou hidaayet bhi nasib huii....aur ye nasib waalon ko hi nasib hoti hai...Jis ne thokaron may maza paaliya usey duniya ka paas kya...Jise ghum-e-mohabbat may mil gaii hon luzzaten usey duniya waalon ka ehsaas kya....Jub daras milte hain tou khud ko daras ki misaal bana lena hi asal koshish hai..Aise may kathin waqt ka samna bhi hoga, sakht dilon say jujhna bhi hoga.....khud ko qaabu may rakhna bhi hoga...Phir ye sab kyon jub ke tu jaanta hai aye dil....

Usne kaha aakhir ye dil dil kyon karta hai...Hai tou khabar dega bhi apni maujudgi ki...ke mai maujud hun tere seene may...shor karta hua....Elaan-e-haq wahin hai.....Emaan ka sadaq wahin hai....Gar ghaur say suno....