Lamha-e-Fikr

Jub bhi is duniya ko ghaur say dekha ye kabhi apni lagi hi nahi…mukhtalif zehen, mukhtalif khayaal..jub bhi unhen padha apni nadaanion ka raha malaal…Haaye ri Duniya tuu vo chaand hai jisne khud may Daagh sajaa rakhe hain….Is duniya ne gharz ke asbaab banaa rakhe hain….Aakhir ye samajh kyon nahi jaate….ke baat sirf itni hai…..zindgi ek khayaal ke siwa kuch bhi nahi…..zindgi ek sawaal ke siwa kuch bhi nahi..jisne isey hul kar liya usne khud ko paaliya...jo khud ko mil gaya,usey khuda mil gaya...

Haan ab khud per ek nazar….jub bhi daali rona aaya…humen bhi tou isi khayaali safar ne baarha gumraah kiya hai…usi ke gardaab taley hum dubtey ubharte rahe….isi dauraan ek lamha aisa nasib hua jo inaam tha….jahaan na-aaqibat-andeshi ke liye pyaam tha…fitrat niyaat ka ghumaaz hai…tabiyet inhi ki damsaaz hai…ye qudrat ka tohfa hai..gharz is duniya say kisi taur hum bhi juda na they…kahin na kahin daam-e-fareb ke aseer hum bhi rahe….

Jub bhi khud per nazr daali rona aaya…Na jaane kyon…Na jaane kyon…kahin koi chor chupa baitha tha waan bhi…usey bhi kuch paane ki chah ne sada sangsar kiya…ye sangsaari karam ka natija thi..warna kahaan kisi ko muyessar hai..log khahishon ke peeche puri umr ganwa dete hain..phir bhi haath kuch nahi aata…khaali daman..khaali dil..tishna rooh…kasmakash ke dauraan koii lamha aisa bhi nasib hua jub koi lamhaati jung hum bhi jeet gaye…ye ehsaas usi ka inaam hain…Aur humne yon paaya apni pehchaan ka safar……