Monday, October 26, 2015

Qismat




phool kya kaanton may bhi khushbu jaage
tum apne khayaal badal kar to dekho


jaane ye daur kaisa hai, soch tak kahin teherti nahi, khayal kabhi haasil ho bhi gaya tou pareshan hojaata hai..aakhir in insanon ne insanon ko unki asal se juda kar hi daala...".qul-awzu-birabil-falaq ' ka vird muh tak raha hai...aakhir kis kis ko rokun..log asaniyon ke dildada....asaan nuskhe azmaate hain...koi teer jub chalta hai tab us teer ki pusht per jo nishan reh jaata hai teer kabhi nahi bhulta....ke kaman per dastaras chahe insan ka sahi per shikaar per nahi hoti..ho bhi jaaye tou zakhmi ke her zakhm ka hisab liya jaata hai...aur uska hisab bilkul seedha hai...zakhm ka badla zakhm...teer ka badla teer....taaki us teer ki taseer se chalane waala bhi waqif ho...na ye ke chala kar bhul jaaye...ektarfa itminaan thik nahi hota....dusre taraf ki kaifiyet se waqif hona bhi hota hai...so mere dosto...jahan bhi is qisam ki koi wardath dekhne ko mile....naseha zarur banen...waayez banen....daana dost banen...


Baat sirf itni hai ke koi dil kisi aur ki targheeb per herkat nahi karta, ye tou raza-e-ilaahi ki hukumat hai...siwa uske koi uski dhadkanon per qabza nahi kar sakta...haan albatta koshishein zarur karta rehta hai ke koi lamha uski giraft may aajaaye, koi lamha uski kisi kamzori ko paa jaaye....bas us kamzor lamhe per ek waqti hamla hi muyassar aajaaye....aur basa awqaat aisa hota bhi hai...aur khuda ki zara si dheel ko apni kamyaabi samajhne waale muzar asraath ye bhul jaate hain ke hum us waqt tak maujud rahenge jub talak ki ijazat hai....agar koi nekdil aah bhi karde tou phir giraft hakim ki aisi hogi ke phir banaaye na banegi....


Ulti hojaayengi sab tadbeerein na dawa kaam karegi na dua....so meri maano mere nadan dosto, in asaan tarkibon se bacho jahan sarasar tumhara ghaata hai....khuda ne socho kis liye achaii aur buraii ko do hisson may baanta hai...her surat may jeet tou achaii ki hai sachaii ki hai....so samjho ke chund roza zindgaani may kya kya paana hai...ya khaali haate aaye they khaali haath jaana hai?

Chund  rupon ke iwaz khudaii fermaan badalne ka koi daawa nahi kar sakta....ektarfa rudaad se koi kisi ke saath insaaf nahi kar sakta...aur fareeqain ki ghalath bayaani ka andaza bhi nahi lagaaya jasakta...so aisi asan tarkibon se daulath to haasil karloge...qismat nahi, hikmat nahi, ke waan kisi ka zor nahi chalta....ulta be-imaan hojaaoge....duniya se to jaaoge hi jaaoge, khuda se bhi door hojaaoge...

Agar waqi kisi ke kaam aana hai tou pehle dilon ko tatolo, phir unki niyaton ko tolo, phir khuda ki raah per holo, aur jub bolo tou haq ki khaatir bolo...Yon nahaq  khuda ke kisi bande ki zindagi se na khelo...


Mohabbat ke vusul




Mohabat maani-o-alfaaz may laai nahi jaati
ye vo nazuk haqeeqat hai jo samjhaii nahi jaati

Najaane kitne dilon ka ye armaan hai ke, aye kaash mujh per bhi kabhi ye inaayet hoti, aye kaash mujh se bhi kisi ko mohabbat hoti...ke mohabbat ka nazaara hi jub itna haseen aur surur bakhsh hai to phir mohabbat paa lene waala ehsaas kitna khubsurat hoga...per aye hasrath-e-junun , tu ghum na kar....ke khuda ne kuch soch kar hi ye mehroomi un dilon ke hisse may likhi, taaki vo mohabbat kisi ek ke liye mehdud hokar na reh jaaye, us mohabbat ko wussat bakhshi jaaye, aur waan ek duniya simat aaye....aur ek alam is azmat ka maza paaye...mohabbat waqi pehchan ki raahen tayeen karti hai...mohabbat jub but-ti hai tab kahin jaa kar phal phul kar jawan hoti hai, aur yaqeen maanein vo ehsaas junnat ke khwab se zyaada khubsurat hai jahaan anginnat dilon ki raahath pesh-e-nazar ho....


Aksar pyaala lubon tak aate aate khinch liya jaata hai, aur pyaasa apni pyaas ki shiddat ka ehsaas karne se bhi pehle mayusi ki daldal may phansta chala jaata hai, phir uska mauf -o-maghlub zehen kuch sochne samajhne ke qaabil nahi rehta...bas shikwa vird ban jaata hai...ghum khaana ansu peena adat ban jaati hai....ek umr ganwa kar mohabbat ko samajh aati hai....ke khuda ne apni hikmat ki kasoti mohabbat hi rakhi hai...."dilon ko tod kar ek naya jazba bedaar karna aur us jazbe may khud aap jhalak uthna.....ke ye khudaii jazba hai apne derd se bekhabar hokar dusron ke derd se bakhabar rehna..aur ye mohabbat ka hi kamaal hota hai jo ishq may mashuq ki jagah mehbub le le....her taraf apne mehbub ka nazara kar le...ke jahaan her nazar mohabbat ho, jahan her dil ishq ki surat ho, phir kya zaruri hai ke tujhe ab bhi mohabbat se shikayet ho..".


Loag to mitti ke hain....magar unki rooh noorani, unki siffat asmaani...magar apni pehchan se pehle khud ko mitti kar lena haq-e-mohabbat nahi hai na hi efa-e-ahad hai...so jub bhi dil mayus hone lage, hasratein behkaane lagein ek lamhe ka tavafuq zaruri hai, "wahi ghaur-o-fikir ka ek lamha mohabbat ko ibaadat kar dega, mohabbat ko sakhawat kar lega."..


Mohabbat sirf apne dil ki farhath nahi hai...mohabbat sirf ek dil ki daulath nahi hai...mohabbat samjho tou jog hai warna roag hai....duniya-o-mafiha se bekhabri mohabbat nahi hai..."bulki aqal-o-faham ki binaii ko jila bakhshne waali, aur dilon ko manzil kar lene waali raah hai mohabbat "...

Ek umar ganwa kar, apni hasti ko qiston may bhula kar, apne sisakte huye armaanon ko ek naii raah dikha kar, Duniya se apna boseeda ,berang ,malgaja daman bacha bacha kar, Aah ! aye mohabbat tujh ko kitne rangon say sajaaya humne...her rang may aks rangrez ka paaya humne....